الشامات

ما في زول في الدنيا جلدو خالي تماماً من الشامات، أو الحسنات زي ما بنسميها في كلامنا الدارجي، الشامة في أصلها عبارة عن تجمع بريء ومترتب للخلايا الصبغية (Melanocytes) في حتة واحدة، وهي في الأغلب الأعم علامة طبيعية جداً بتظهر في الطفولة أو الشباب وبتقعد مع الزول طول عمرو بسلام، لكن السؤال المهم في باب عوامل الخطر هو: متين الشامات دي تتحول من مجرد علامة جمال لعامل خطر حقيقي يستدعي الحذر؟

في الطب، التقييم ما بعتمد على وجود شامة عادية بعينها قدر ما بعتمد على العدد والنمط العام في الجسم، في تلاتة حالات محددة بتخلي الشامات تدخل في دائرة الخطر الحقيقي

الحالة الأولى هي الكثرة المفرطة، يعني الزول الجسمو مليان بعشرات الشامات الكتيرة

الحالة التانية هي وجود ما نسميه الشامة غير النمطية، ودي شامة بتكون كبيرة شوية، حدودها ما مرسومة بوضوح، وفيها أكتر من درجة لون جواها

أما الحالة التالتة فهي الشامة الخلقية الكبيرة، ودي الوحمات الصبغية الضخمة البتولد بيها الطفل وتغطي مساحة واسعة من ضهرو أو جسمو، ودي بالذات بتحمل خطر حقيقي لأن تخرج منها خلايا متمردة مع مرور الزمن

وجود واحدة من الحالات التلاتة دي ما معناه إن الزول مصاب بالسرطان، لكن معناه إنو محتاج عين خبيرة تتابع معاهو الخريطة دي بانتظام

ومع كل الكلام ده، لازم نخت حقيقة علمية تخص بشرتنا الداكنة قدام عينينا عشان الصورة ما تختل: أغلب حالات الميلانوما في العالم عموماً، وعندنا في البشرة السمراء بشكل أخص، ما بتطلع من شامة قديمة كانت قاعدة واتحولت، وإنما بتنشأ في حته جديدة (De novo) من جلد كان صافي وما فيهو أي شامة أصلاً، وتحديداً في الأماكن الطرفية البعيدة زي باطن القدم وتحت الأظافر، الورم هناك ببدأ حكايتو من الصفر

عشان كده، مراقبة الشامات القديمة وتغيراتها حاجة مهمة ومطلوبة، لكن الاعتماد عليها براها وتجاهل البقع الجديدة البتظهر في الأماكن المنسية هو الفخ الأكبر، الشامة الثابتة الهادية بتفضل مطمئنة، والجديد المتغير هو البستحق السؤال

وفي خطر بنورثو ما بنكتسبو، وده موضوع البوست الجاي

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام