زول بحك جلدو من شهور، ولمن تعاين ليهو تلقى خدوش، وقشور، وبقع غامقة، ومرات الجلد ذاتو بقى سميك وخشن، السؤال المهم هنا: الحاجات دي كانت موجودة قبال الحكة، ولا الحكة هي العملتها؟ لأن الفرق كبير
في أمراض الجلد العادية، الطفح الأصلي غالبا بظهر الأول وبعدها تبدأ الحكة، زي الإكزيما والشرى والجرب، هنا الجلد نفسو عندو مشكلة واضحة من البداية
بس مرات الحكة بتبدأ فوق جلد شكله طبيعي، وبعد أسابيع من الحك والفرك تبدأ تظهر الخدوش والقشور والتصبغات، وقتها العلامات البنشوفها ما هي المرض الأصلي، دي آثار الضفر، الإرشادات الحديثة للحكة المزمنة بتفرق بين الحاجتين ديل بالضبط: طفح أولي كان موجود من بداية الحكة، وتغيرات ثانوية صنعها الحك بعد ما بدأت المشكلة
وده بفسر ليه صورة الجلد وقت الكشف مرات بتخدع، لأن الزول الممكن يكون بدأ بحكة من غير أي طفح، بعد شهرين يصل الطبيب وجلدو مليان علامات، فتحتاج ترجع بالقصة لأول يوم، موش لليوم البتشوفو قدامك، عشان كده واحد من أهم الأسئلة في الحكة المزمنة هو: أول حاجة حصلت شنو؟
لو الحكة جات أول، وكانت عامة ومستمرة، وما في مرض جلدي واضح يفسرها، وقتها بنوسع البحث حسب العمر والقصة والأدوية والحالة الصحية، ومرات نحتاج تحاليل موجهة للكلى والكبد والغدة والحديد والسكر والدم، حسب القرائن الموجودة، ما باقة تحاليل محفوظة لكل زول
وفي حالات كتيرة السبب بكون جلدي بسيط، أو دواء، أو مشكلة عصبية، ومرات ما بنلقى سبب واضح من أول تقييم، عشان كده الحكة من غير طفح ما معناها تلقائيا إن في مرض خطير متدسي
لو داير تشوف الفرق، فتش في قوقل صور بعبارة (chronic pruritus excoriations dark skin)، عشان تعرف شكل آثار الحك الثانوية على البشرة الداكنة، ما عشان تحكم على سبب الحكة عندك من صورة
وفي المرة الجاية حنشوف مشكلة مختلفة: مرات المرض موجود والصورة البتفتش عنها هي الما موجودة