الباب الثالث: حكة ما بتهدا مع الغسيل الكلوي

أمراض الكلى عندها طريقة قاسية جداً في التعبير عن نفسها على الجلد، وأشهر وأقسى الطرق دي هي الحكة اليوريمية (Uremic pruritus)

مرضى الفشل الكلوي، خصوصاً البغسلوا كلى، بعانوا من حكة مستمرة وعنيفة شديد، بتزيد بالليل، ومرات بتزيد أثناء أو بعد جلسة الغسيل ذاتها، لمن نعاين لجلدهم، ما بنلقى طفح أولي ولا حبوب، وإنما بنلقى آثار المعاناة: خدوش عميقة، وجلد جاف جداً، وتصبغات بنية غامقة أو رمادية ناتجة من الحك المستمر في البشرة الداكنة

السبب الدقيق للحكة دي معقد، وداخل فيهو تراكم السموم الما قادرة الكلى تصرفها، وجفاف الجلد الشديد، ولخبطة في مستويات الكالسيوم والفوسفور في الدم، وتفاعل من جهاز المناعة والأعصاب الطرفية، المشكلة انو الحكة دي ما مجرد «جفاف» بتعالج بمرطب عادي، وإنما هي انعكاس مباشر للقصور الكلوي

أهمية الشاهد ده انو بورينا انو الجلد ما منفصل عن مصفاة الجسم، علاج الحكة دي بتطلب تعديل في كفاءة الغسيل، وتزبيط المعادن في الدم، وأدوية معينة بتشتغل على الأعصاب، بالإضافة لترطيب الجلد المكثف

لو داير تشوف شكل آثار الحكة دي، فتش في قوقل صور بعبارة (uremic pruritus excoriations dark skin)، علشان تعرف كيف الجلد بعكس المعاناة الداخلية الطويلة

وفي المرة الجاية حنشوف علامة تانية بتكتبها الكلى، لكن المرة دي على الأظافر، وبتقسم الظفر لنصين بلونين مختلفين