زول بظهر ليهو طفح جلدي أحمر أو بنفسجي غامق، بعمل فقاعات وبقشر، وبكون مركز حوالين الفم، أو في الأطراف، أو في المناطق التناسلية، الطفح ده بخف من مكان وبظهر في مكان تاني كأنو قاعد يهاجر في الجلد، الزول بياخد علاجات إكزيما، ومضادات فطريات، وكورتيزون، والمشكلة قاعدة تتأخر وتسوء لشهور
الطفح ده اسمو الحمامى النخرية المهاجرة (Necrolytic migratory erythema)، وهو واحد من أقوى الشواهد في طب الجلدية، الطفح ده بكون العلامة الأولى في حوالي سبعين بالمية (٧٠٪) من الحالات لورم نادر جداً في البنكرياس اسمو الغلوكاغونوما (Glucagonoma)
الورم ده بفرز هرمون الجلوكاغون بكميات كبيرة، وده بلخبط استقلاب البروتينات في الجسم وبدمر خلايا الجلد بالطريقة دي، المأساة في المرض ده انو بتشخص بالغلط كإكزيما أو فطريات عنيدة، والدراسات بتوري انو متوسط التأخير في التشخيص بصل لحوالي أربعتاشر شهر (١٤)، وفي النص ده من الحالات بكون الورم الداخلي انتشر قبال ما الزول يعرف
علشان كده، الطفح ده ما بنسكت عليهو، لمن يجي مع نقصان وزن غير مبرر، وتعب، ولسان أحمر وملتهب، وسكري ظهر فجأة من غير مقدمات، الجلد هنا بكون رفع راية حمرا واضحة، والطبيب مفروض يطلب تحاليل دقيقة لمستوى الهرمون في الدم وتصوير للبطن علشان يقفل الدائرة
لو داير تشوف شكل الطفح ده، فتش في قوقل صور بعبارة (necrolytic migratory erythema dark skin)، علشان تعرف كيف الطفح المهاجر بختلف من الفطريات العادية لمن تشوفو، ما علشان تشخص نفسك
وبكده بنقفل باب الكبد والجهاز الهضمي، وفي المرة الجاية حنفتح باب الكلى، ونبدأ بأشهر شكوى بتصحي مريض الكلى من النوم