في عالم الأمراض المناعية، في أمراض بتضرب الناس سواسية، وفي أمراض بتفضل جينات وبشرات معينة، المرض الحنقف معاهو الليلة اسمو الساركويد (Sarcoidosis)، وهو بمثل واحد من أكتر الأمراض البتستهدف الأصول الأفريقية وبشرتنا الداكنة
لغة الأرقام هنا قاطعة وراسخة: الوقوع السنوي للمرض ده بصل لحوالي سبعتاشر فاصلة تمانية (١٧،٨) لكل مية ألف عند السود، مقابل تمانية فاصلة واحد (٨،١) بس عند البيض، والأهم من الكثرة دي، انو الساركويد لمن يصيب زول أسمر، بكون أشرس، وبضرب أعضاء كتيرة مع بعض، ومسارو بكون معقد أكتر
الساركويد بخلي المناعة تكوّن كلاكيع أو عقد صغيرة (Granulomas) بتتراكم جوا الأعضاء، وأشهر عضوين بنضربوا هم الرئة والجلد، الشاهد في الجلد بظهر في شكل بقع، أو حبوب، أو عقد بارزة، والمشكلة انو في الكتب الطبية بتتوصف العقد دي بلون أحمر أو تفاحي، لكن في بشرتنا الداكنة اللون ده مرات بختفي، وبتظهر العقد بلون بنفسجي غامق، أو بني، أو رمادي
علشان كده، الفحص هنا ما بعتمد على العين براها، وإنما بعتمد على اللمس واليد، الطبيب بحس القساوة والصلابة بتاعت العقد دي تحت الجلد، ولمن الجلد يرفع الراية دي، طوالي بنوجه البوصلة للرئة، ونطلب صور أشعة للصدر، لأن الجلد غالباً بكون قاعد يبلغ عن كلاكيع مشابهة سادة مجاري التنفس جوا
لو داير تشوف التنوع الكبير لأشكال المرض ده على بشرة زي بشرتنا، فتش في قوقل صور بعبارة (Cutaneous sarcoidosis dark skin)، علشان تدرب عينك على اللون والملمس، ما علشان تشخص أي حبة في جسمك
وفي المرة الجاية حنشوف كيف الساركويد ده بختار مكان عجيب جداً علشان يظهر فيهو، الاهو الندبات والجروح القديمة