الباب الرابع: الجلد الزي الشبكة

في أيام البرد الشديد، مرات عند بعض الناس الجلد في الرجلين والايدين بياخد شكل شبكة خفيفة لونها مايل للأزرق، وبمجرد ما الزول يتدفى، الشبكة دي بتختفي والجلد برجع للونو العادي، التفاعل ده فسيولوجي ومطمئن تماماً

لكن الشاهد الجلدي بغير لغتو لمن الشبكة دي تظهر وتفضل ثابتة في الصيف والشتاء، وتكون حلقاتها ما مكتملة ومكسرة، ولونها بنفسجي غامق وواضح، العلامة دي بنسميها الليفيدو المتشجرة (Livedo racemosa)

الشبكة دي ما بتترسم على الجلد ساي، وإنما بتعكس مشكلة حقيقية في سريان الدم، الأوعية الدموية الصغيرة بتكون اتسدت بجلطات دقيقة، فالدم بيبطيء سيرو وبعمل الشكل الشبكي ده، لمن العلامة دي تظهر، خصوصاً عند شابة عندها تاريخ بتاع إجهاض متكرر، أو جلطات في الساق، الجلد هنا بكون وفر علينا مسافة طويلة وأشر لمرض مناعي اسمو متلازمة الفوسفوليبيد (Antiphospholipid syndrome)

المناعة هنا بتكوّن أجسام مضادة بتخلي الدم يتجلط بسرعة غير طبيعية، والشبكة دي بتكون الإنذار المبكر البخلي الطبيب يبدأ علاجات مسيلة للدم قبال ما تحصل جلطة في مكان حساس زي الدماغ أو الرئة

لو داير تشوف شكل الشبكة دي على بشرة زي بشرتنا، فتش في قوقل صور بعبارة (Livedo racemosa dark skin)، علشان تدرب عينك على التفريق بينها وبين تفاعل البرد العادي، ما علشان تفزع من أي تغيير في لونك

وفي المرة الجاية حنشوف عقد بتطلع في المرافق، وكفوف خشنة كأنها حقت زول شغال ميكانيكي، وبتشهد على أمراض المناعة والمفاصل