تخشن الجلد في الكفوف، والتشققات البتظهر في أطراف الأصابع، حاجة عادية جداً عند الناس الشغالين في مهن يدوية قاسية، زي عمال البناء والميكانيكية والمزارعين، ده مجرد رد فعل طبيعي من الجلد للاحتكاك المستمر، وبسميهو كالو أو خشونة عمل
لكن القرينة بتلفت الانتباه لمن الخشونة والتشققات دي تظهر في أطراف أصابع زول ما بشتغل أي شغل يدوي قاسي كلو كلو، وتحديداً في حواف الأصابع من جهة الإبهام، العلامة دي في الطب بنسميها ايدين الميكانيكي (Mechanic's hands)، وهي من العلامات المساندة القوية لمرض الجلادة العضلية الاتكلمنا عنو قبال كده، وبترتبط بضعف العضلات ومشاكل الرئة
وفي علامة تانية بتظهر حوالين المفاصل، كعقد قاسية تحت الجلد في منطقة المرفق (الكوع) من بره، أو في مفاصل الايدين، العقد دي غالباً ما بتوجع، لكنها بتعكس وجود التهاب مزمن وشرس في المفاصل، وتحديداً الروماتويد (Rheumatoid arthritis)
الشواهد دي بتأكد لينا انو الجلد مرات بكتب تقرير مفصل عن حالة المفاصل والعضلات من جوا، الطبيب لمن يلقط العلامات دي، بربطها طوالي بأي ألم مفصلي أو صعوبة في التنفس، وبطلب فحوصات مناعية دقيقة
لو داير تشوف شكل التشققات دي والعقد على بشرة زي بشرتنا، فتش في قوقل صور بعبارة (Mechanic's hands dark skin)، علشان تفهم الفرق بينها وبين الخشونة العادية، ما علشان تشخص أي تشقق جفاف في يدك
وبكده بنقفل باب أمراض المناعة الذاتية، وفي المرة الجاية حنفتح باب الدم ونخاع العظم، ونبدأ بالشحوب وكيف نفتش عنو في سمارنا