مرات الزول بلقى كدمة زرقا أو خضرا في فخذو أو ضراعو، وبقعد يتذكر اتخبط وين ومتين وما بتذكر أي ضربة، ظهور الكدمات دي حاجة بتصادفنا كلنا، وفي الأغلب الأعم بتكون مجرد خبطة خفيفة الزول نساها في زحمة اليوم، أو بسبب استخدام أدوية شائعة زي الأسبرين ومسكنات الألم البتزيد سيولة الدم شوية، وبرضو مع التقدم في العمر الجلد والأوعية الدموية ببقوا أرق وأي ضغطة بسيطة ممكن تسيب أثر، دي كلها حالات مطمئنة وما بتخوف
لكن القرينة بتتحول لشاهد بنادينا للتدخل لمن الكدمات دي تظهر فجأة بأحجام كبيرة، وفي أماكن غريبة ما معرضة للاحتكاك زي البطن أو الضهر، والأهم من ده كلو انها تظهر من غير أي ضربة كلو كلو، ولمن تترافق الكدمات دي مع نزيف متكرر من اللثة أو الأنف، أو تعب عام وإرهاق غير مبرر
الجلد هنا بكون قفل باب الاحتمالات البسيطة وأشر لمشكلة في مصنع الدم، عشان كده الشواهد دي بتخلي الطبيب يطلب صورة دم كاملة وفحوصات لسيولة الدم عشان يتطمن على عدد الصفائح الدموية وكفاءة عوامل التجلط، لأن الجلد بكون أدى دورو كشاشة عرض للخلل الحاصل جوا الأوعية
لو داير تشوف التفاوت في أشكال الكدمات، فتش في قوقل صور بعبارة (spontaneous bruising dark skin)، عشان تعرف تفرقها من كدمات الضربات العادية، ما عشان تشخص مرضك براك
وفي المرة الجاية حنشوف كدمات أو بقع بتظهر مع حمى عالية، وبتخلي الثواني ذاتها تفرق في إنقاذ الحياة