الباب الخامس: الساعات البتفرق

ظهور طفح جلدي مع حمى، خصوصا عند الأطفال، من أكتر الحاجات البتخلي الأهل يجروا طوالي للدكتور، وفي العادة الطفح ده بكون مجرد تفاعل مع التهاب فيروسي عابر، أو حساسية من دواء، وبمجرد ما الحرارة تنزل وتمر كم يوم الطفح بختفي والطفل برجع لطبيعتو

لكن في شاهد جلدي بخلي أطباء الطوارئ يعلنوا حالة الاستنفار القصوى، لأن التأخير فيهو بكلف حياة، الشاهد ده بكون عبارة عن بقع حمرا أو بنفسجية غامقة، ومرات مايلة للسواد في بشرتنا الداكنة، بتظهر فجأة وبتنتشر بسرعة مع حمى عالية شديد وتعب عام

هنا بنرجع لاختبار القزازة السحري الاتعلمناهو في أول السلسلة، لمن تضغط على البقع دي بكباية قزاز شفافة، فاللون ما بختفي، والبقع الما بتتبيض بالضغط دي (non-blanching rash) بتعني انو الدم طلع بره الأوعية الدموية، ولمن تجي العلامة دي مع حمى ووهن أو تيبس في الرقبة، دي حالة اشتباه عالية لالتهاب السحايا بالمكورات السحائية (meningococcemia) أو الفرفرية الخاطفة

وهنا بنخت خطين حمر، الحالة دي بتستدعي طوارئ الليلة هسي قبال بكرة، لأن الميكروب بكون وصل الدم وقاعد يدمر الأوعية بسرعة، الجلد هنا ما ببلغ عن مرض جلدي، وإنما بطلق صفارة إنذار للتدخل لإنقاذ الحياة بالمضادات الحيوية الوريدية

لو داير تشوف شكل الطفح الخاطف ده، فتش في قوقل صور بعبارة (purpura fulminans dark skin)، عشان تعرف العلامة البتستدعي طوارئ، ما عشان تفزع من أي حساسية عادية

وفي المرة الجاية حننتقل لمرض بضرب نخاع العظم، ومرات بقرر يكتب رسالتو كلاكيع وعقد فوق الجلد