ظهور كلاكيع أو عقد تحت الجلد حاجة بتمر علينا كتير، وفي الأغلب الأعم العقد دي بتكون أكياس دهنية حميدة، أو تكتلات بتاعت خلايا دهنية، أو مجرد تفاعل قاسي بعد قرصة حشرة أو ضربة قديمة
الحاجات دي بتكبر ببطء شديد أو بتفضل ثابته حجمها لسنين وما بتشكل أي خطر لكن القرينة بتلفت الانتباه لمن العقد دي تظهر فجأة وتتكاثر في فترة بسيطة، ويكون ملمسها قاسي زي المطاط، ولونها قالب للبنفسجي أو البني المائل للاحمرار
ولمن الشواهد دي تترافق مع حمى، ونقصان وزن من غير رجيم، وعرق غزير بالليل، وتعب عام، الطبيب ببدأ يفتش أبعد من الجلد، لأنو العقد دي مرات بتكون عبارة عن خلايا سرطانية هاربة من نخاع العظم، وتحديدا خلايا الدم البيضاء المتمردة في مرض ابيضاض الدم أو اللوكيميا
الحالة دي بنسميها ارتشاح اللوكيميا الجلدي (leukemia cutis)، الخلايا دي بتسيب الدم وبتمشي تستقر في نسيج الجلد وتعمل الكلاكيع القاسية دي كعلامة واضحة وملموسة للمرض الداخلي وجود العلامة دي بساعد في التوجيه السريع لفحوصات الدم المتخصصة وعينة نخاع العظم
الجلد هنا بكون وفر خطوة مهمة في مسار التشخيص وأشر بوضوح لمكان الخلل الأساسي
لو داير تشوف شكل العقد المطاطية دي، فتش في قوقل صور بعبارة (leukemia cutis dark skin)، عشان توسع عينك على أشكالها المتعددة، ما عشان تشخص كيسك الدهني من صورة
وفي المرة الجاية حنشوف كيف الجلد بقلد أمراض تانية بمهارة، وكيف ورم سرطاني بقرر يلبس توب الإكزيما سنين طويلة