زول بلاحظ كدمات بتظهر حوالين عينو أو في رقبتو من غير أي ضربة، ومرات بتظهر بمجرد ما يكح أو يعطس أو يدعك عيونو بقوة، وممكن يجي معاها تعب عام ولسان متضخم وكبير بصورة واضحة، هنا دي ممكن تكون حالة اسمها الأميلويد (amyloidosis)
بحصل فيها انو مصنع الدم في نخاع العظم بفرز بروتينات غير طبيعية بتسري في الدم وتترسب في الأنسجة، ومن ضمنها الأوعية الدموية الدقيقة في الجلد، اها البروتينات دي بتخلي الأوعية الدموية هشة شديد وتنزف من أقل ضغطة أو احتكاك بسيط
في بشرتنا الداكنة الكدمات حوالين العين دي مرات بتتفهم كأنها هالات سودا عادية أو علامات بتاعت إرهاق وقلة نوم، لكنها في الحقيقة نزيف صريح تحت الجلد بنسميه فرفرية القرص (pinch purpura)، الشاهد ده هنا مهم جدا لأنو بفتح باب التشخيص لمرض جهازي خطير ممكن يضرب القلب والكلى والأعصاب لو ما اتعالج بدري
ظهور الكدمات السهلة في مناطق ما معرضة للضربات، خصوصا لو اترافقت مع تضخم اللسان، بتستدعي فحص دم متخصص لمعرفة نوع البروتينات الشاذة دي ومصدرها
لو داير تشوف شكل الكدمات دي حوالين العين على بشرة زي بشرتنا، فتش في قوقل صور بعبارة (pinch purpura amyloidosis dark skin)، عشان تعرف شكل النزيف ده، ما عشان تشخص الهالات السودا بتاعتك من صورة
وفي المرة الجاية حنفتح باب القلب والأوعية ونشوف الأصابع لمن تتنفخ وتاخد شكل غريب