بعد جردنا علامات الدم ونخاع العظم في الباب الفات، الليلة حنفتح باب جديد ونمشي للقلب والرئة والأوعية الدموية، ونبدأ بعلامة قديمة ومعروفة بتظهر في أطراف الأصابع.
الزول بلاحظ انو أطراف أصابعو انتفخت وبقت مدورة زي المضرب، والزاوية بين الظفر والجلد اختفت تماما، والظفر نفسو بقى مقوس وعريض، التغير ده بنسميهو تعجر الأصابع (Clubbing)
في ناس بتولدوا وأصابعهم شكلها كده وراثة من أهلهم، دي حاجة طبيعية وما وراها أي مشكلة مرضية، لكن العلامة أو العَرَض ده بيستدعي انتباه حقيقي؛ لمن التعجر يظهر فجأة عند زول بالغ، والأصابع تتغير خلال شهور.
الجلد هنا بكون قاعد يشتكي من نقص مزمن في الأكسجين، والشاهد ده بربطنا طوالي بأمراض خطيرة في الرئة زي التليف أو الأورام، أو أمراض القلب الخلقية البتأثر على ضخ الدم، وبرضو بظهر في بعض أمراض الجهاز الهضمي زي تليف الكبد والتهابات الأمعاء.
الطبيب لمن يعاين للأصابع ويلقط التغير ده، ما بكتب مرطب، وإنما بطلب صورة صدر وفحوصات للقلب والرئة عشان يصطاد المشكلة الأساسية قبال ما تتفاقم.
لو داير تشوف التغير في الزاوية وشكل الظفر على بشرة زي بشرتنا، فتش في قوقل صور بعبارة (Clubbing of fingers dark skin)، عشان تدرب عينك، ما عشان تشخص شكل أصابعك الطبيعي من صورة.
وفي المرة الجاية حنشوف خطوط دقيقة بتظهر تحت الظفر وبتخلينا نفتش عن القلب.