ظهور خطوط رفيعة ولونها أحمر غامق أو أسود تحت الظفر عاملة زي شظايا الخشب حاجة بتمر علينا كتير، الخطوط دي بنسميها النزف الشظوي (Splinter hemorrhages).
في الأغلبية الساحقة من الحالات الخطوط دي بتظهر بعد ضربة في الظفر، أو عند الناس الشغالين في مهن يدوية قاسية زي النجارة أو الزراعة، ده مجرد نزيف صغير جدا تحت الظفر بسبب إصابة ميكانيكية، وبمشي لقدام مع نمو الظفر لحدي ما يختفي كلو كلو، ودي حاجة مطمئنة جدا.
لكن العلامة دي بتنقلب وتفتح باب القلب لمن الخطوط تظهر فجأة وبكميات كبيرة في أكتر من ظفر، وتترافق مع حمى وتعب عام، من غير ما الزول يكون اتعرض لأي ضربة أو احتكاك.
الخطوط دي مرات بتكون عبارة عن جلطات دقيقة جدا انفصلت من صمامات القلب الملتهبة وسافرت مع الدم لحدي ما سدت الأوعية الدموية الصغيرة تحت الظفر، الحالة دي بتعكس التهاب الشغاف العدوائي (Infective endocarditis)، وهو التهاب بكتيري خطير بضرب صمامات القلب.
وجود الخطوط دي في سياق الحمى ما التهاب في الظفر، وإنما جرس إنذار ببلغ الطبيب انو في بكتيريا قاعدة تدمر صمامات القلب ومحتاجة مضادات حيوية بالوريد طوالي.
لو داير تشوف شكل الخطوط دي على بشرة زي بشرتنا، فتش في قوقل صور بعبارة (Splinter hemorrhages dark skin)، عشان تعرف تفرقها، ما عشان تفزع من أي ضربة في ظفرك
وفي المرة الجاية حنصحح معلومة قديمة عن علامات القلب ونعرف ليه الحاجات المشهورة دي بقت نادرة في زمنا ده.