طفل بجي بحمى وألم في المفاصل بتتنقل من مفصل للتاني، وبتظهر في جسمو حلقات وردية باهتة بتكبر من بره وبتبهت من جوا، الحلقات دي بتظهر وتختفي بسرعة، مرات في خلال ساعات، دي علامة بنسميها الحمامى الهامشية (Erythema marginatum)
ظهور أي طفح حلقي عند الأطفال في الأغلب الأعم بكون بسبب حساسيات عادية أو فطريات سطحية زي التينيا البتتعالج بكريمات بسيطة، أو حتى تفاعلات فيروسية عابرة بتروح براها، وكلها حاجات مطمئنة جدا وما بتشكل خطر حقيقي على صحة الطفل
لكن لمن الحلقات دي تجي مع حمى وألم مفاصل وحركات غير إرادية، فالقرينة دي بتوجهنا طوالي لمرض الحمى الروماتيزمية البضرب صمامات القلب، والمفارقة العجيبة في بيئتنا السودانية والأفريقية انو بداية الكارثة دي مرات بتكون من حشرة صغيرة جدا
مرض الجرب (Scabies) البعمل حكة شديدة بالليل بخلي الطفل يخدش جلدو باستمرار والخدوش دي بتكسر حيطة الحماية الأولى وبتفتح الباب لبكتيريا اسمها البكتيريا العقدية عشان تدخل وتعمل التهاب، والالتهاب ده بهيج جهاز المناعة البقوم يكوّن أجسام مضادة بتلخبط في العنوان، وبدل ما تضرب البكتيريا براها بتمشي تهاجم صمامات القلب والكلى بالغلط
عشان كده علاج الجرب في مجتمعاتنا والبيئات المكتظة ما مجرد راحة من الحكة المزعجة، وإنما هو وقاية حقيقية ورخيصة جدا من تلف صمامات القلب والفشل الكلوي البجي بعدين، الجلد هنا بكون مسرح المعركة الأولى البتحدد مصير القلب
لو داير تشوف شكل الحلقات دي على بشرة زي بشرتنا، فتش في قوقل صور بعبارة (Erythema marginatum dark skin)، عشان تعرف شكلها الخاطف، ما عشان تفزع من أي فطريات عادية وفي المرة الجاية حنشوف طفل بتجيهو حمى بتعاند كل الأدوية لخمسة أيام، والجلد بورينا كيف نحمي قلبو