قرحة الساق الما بتقفل من أكتر الشكاوى البنشوفها عند كبار السن، الزول بلف على العيادات ويستخدم كريمات ومضادات حيوية والقرحة قاعدة تكبر وتوجع وتعطل حركتو اليومية في الأغلب الأعم القروح دي بكون سببها مشكلة في الأوعية الدموية، بس التفريق بين قرحة الأوردة وقرحة الشرايين بحدد مسار العلاج كلو
القرحة الوريدية (Venous ulcer) بتطلع غالبا في الجزء التحتاني من الساق من جوه، وبتكون سطحية وحوافها متعرجة، ومعاها تورم في الرجل وتغير في لون الجلد للبني الغامق القرحة دي في العادة ما بتوجع شديد إلا لو اتلوثت، وعلاجها الأساسي بعتمد على رفع الرجل ولبس الشرابات الضاغطة عشان نساعد الدم الراكد يرجع للقلب، دي حالة بتعكس كسل وتعب في الأوردة البترفع الدم لفوق
لكن القرينة بتختلف كلو كلو في القرحة الشريانية (Arterial ulcer)، دي بتطلع في أطراف الأصابع أو كعب القدم أو أطراف الساق من بره، وبتكون عميقة كأنها محفورة بآلة حادة، والجلد حواليها بكون بارد وناشف ولامع ومسحوب منو الشعر الأهم من ده كلو انها بتوجع وجع شديد جدا
الألم ده بزيد بالليل لمن الزول ينوم، وبخليهو ينزل كراعو من السرير أو يتمشى في الغرفة عشان الجاذبية تساعد الدم يوصل ويرتاح شوية، الجلد هنا بورينا نوع الخلل في الأنابيب البتغذي وتصرف الدم استخدام الشراب الضاغط لقرحة شريانية ممكن يقطع الدم البسيط الفاضل ويعمل كارثة حقيقية بتنتهي بالغرغرينا، عشان كده مكان القرحة وشكلها والألم بتاعها هم البحددوا خطة العلاج والتوجيه الصاح
لو داير تشوف الفرق بين القرحتين دي على بشرة زي بشرتنا، فتش في قوقل صور بعبارة (Venous vs arterial ulcer dark skin)، عشان تعرف تفرقهم، ما عشان تعالج قرحتك براك
وفي المرة الجاية حنشوف كيف الجلد المطاطي والمفاصل البتتلوى ممكن تخفي وراها مشكلة في الأوعية الكبيرة