الفكرة المريحة انو الخطر كلو في العلب المقلدة، وانو الأصلي سليم، الحلقة الفاتت هزّت الفكرة دي من أساسها،
حتى من غير كورتيزون، المنتجات دي ما زي ما مكتوب عليها
مثلا في لوشن كارووايت جاي من غانا اتدمر في الحدود البريطانية سنة 2024 عشان فيهو هيدروكينون، والسويد بلّغت سنة 2022 عن كريم كارووايت من ساحل العاج فيهو هيدروكينون اتنين بالمية 2%، وفي كندا، صحفيين ودّوا عينات للمعمل، لقوا منتج كارووايت مكتوب عليهو هيدروكينون 2%، وجواهو أكتر من أربعة بالمية 4%، يعني أكتر من ضعف الحد المسموح، وكندا من سنة 2019 ما بتسمح ببيع أي منتج فيهو هيدروكينون فوق 2% إلا بروشتة، وأوروبا سحبت لوشن كارووايت سنة 2024 عشان حمض الكوجيك (kojic acid) فيهو فوق حد الواحد بالمية 1%، مع مخاوف من أثرو على الهرمونات
والسودان عندو قياسو الخاص، دراسة حللت تلاتين 30 كريم تفتيح بتتباع في السودان، ولقت الهيدروكينون في الكريمات المحلية من صفر لحدي 5.75%، وفي المستوردة لحدي 3.21%
إذن الزولة البتشتري العلبة دي قدامها تلاتة طبقات من الغموض، الطبقة الأولى التركيبة نفسها، فيها هيدروكينون في أسواق وما فيها في أسواق تانية، الطبقة التانية الدفعات، بتجي بكورتيزون ما مكتوب وبكميات متفاوتة، والطبقة التالتة المقلد، فيهو أي حاجة ختاها المقلد، وما عندها أي طريقة تعرف العلبة الفي إيدها من ياتو طبقة
والحرب زادن تعقيد الوضع، من ما قامت، الأدوية المقلدة غرقت الأسواق، وفي وسط دارفور الأدوية بتدخل مهربة عبر تشاد من غرب أفريقيا، نفس الأرض الجاي منها الكارووايت من ساحل العاج والكاروتون من غانا، صيدلي في نيالا قال انو كل حاجة ببيعها اسي ما مسجلة، وصيدلانية في عطبرة قالت انو الرقابة عملياً ما موجودة لأنو ما فضل شي يتراقب، كريم كان أصلاً ما مضمون، بقى اسي بتباع بلا أي عين بتراقبو