أنبوبة الديرموفيت الصغيرة، لمن الدكتور يكتبها في الروشتة، بتكون التعليمات فيها تلاتة شروط مهمة: الدواء ما يتمسح أكتر من أربعة أسابيع 4 متواصلة، والكمية في الأسبوع ما تتعدى خمسين جرام 50، ولمن الحالة تتحسن يتسحب بالتدريج موش فجأة، لأنو الوقف المفاجئ ممكن يرجّع المرض أقوى من الأول
خلونا نعمل الحسابات بافتراض واحد: انو العلبة فيها نفس التركيز اللقوهو في أنبوبة الكارووايت البريطانية، بالتركيز ده، تسعة وخمسين جرام من الكريم بتوصّل الحد الأسبوعي الكامل للكلوبيتازول، والزولة البتمسح وشها، رقبتها، ضراعاتها، وإيديها مرتين في اليوم، بتستعمل حوالي سبعين لتمانين جرام 70-80 في الأسبوع
يعني بتتجاوز السقف الأسبوعي في أماكن الدواء ممنوع يتمسح فيها أصلاً زي الوش، ولمدة شهور وسنين بدل أربعة أسابيع، والعلبة التلتمية جرام ، لو كان فيها نفس التركيز، بتكون شايلة كلوبيتازول قدر الفي تمانية أنابيب ديرموفيت
ده حساب توضيحي موش قياس، لأنو التركيز بتغير من دفعة لدفعة ومن علبة لعلبة، وده في حد ذاتو جزء من المشكلة: ما في زول بعرف العلبة الفي الكوميدين بتاعك فيها كم، ولا حتى البياع