القسم الأول: نعرف بشرة وشنا (ملحق أسئلة القراء - 1) - الاسمرار الفوري والمتأخر: مصنع اللون بشتغل كيف

مشوار نص ساعة في شمس الخرطوم، ترجعي تعايني في المراية تلقي وشك أغمق درجتين، وتستغربي السرعة دي كلها حصلت كيف ومتين الجلد لحق يصنع صبغة جديدة بالسرعة دي

السرعة دي سببها تفاعل اسمو التصبغ الفوري (Immediate pigment darkening)، وده ما معناهو انو جلدك لحق صنع لون جديد في نص ساعة، الحاصل هنا هو أكسدة وإعادة توزيع للميلانين الموجود أصلا جوه الخلايا

التفاعل ده بحصل في دقايق معدودة نتيجة التعرض للأشعة فوق البنفسجية أ (UVA) والضوء المرئي كمان، وممكن يستمر لساعتين، ولو زاد التعرض المستمر أكتر من الساعتين ديل، التصبغ الفوري بدخل في مرحلة تانية اسمها التصبغ المستمر (Persistent pigment darkening)، ودي بتمتد لأربعة وعشرين ساعة، وبرضو بتعتمد على أكسدة الميلانين وتوزيعه من غير بناء صبغة جديدة

لو تخيلنا الجلد كحواشة، التصبغ الفوري والمستمر عامل زي العمال القاعدين في السطح ومجهزين أكياس الرمل، أول ما يحسوا بخطر الضوء بفتحوها وبوزعوها بسرعة عشان تحمي الخلايا من جوه، اللون الغامق البظهر ليك فجأة ده هو نفس الميلانين بتاعك، بس لونو اتغير لأنو اتأكسد بفعل الأشعة الضوئية وفوق البنفسجية

الاسمرار المتأخر (Delayed tanning) قصة تانية خالص، وده تصبغ ببدأ يظهر بعد أيام وبستمر لأسابيع ومرات شهور، لأنو عبارة عن بناء ميلانين جديد من الصفر، الأشعة فوق البنفسجية ب (UVB) بتخترق الجلد وتعمل ضرر في الحمض النووي (DNA) بتاع الخلايا الكيراتينية، فالجسم بوقف أي حاجة تانية وبدي أمر للمصنع عشان يفرز صبغة جديدة تحمي الجلد من أي هجوم جاي، العملية دي بتاخد وقت لأنها بتحتاج إنزيمات وخطوات تصنيع معقدة بتكتمل خلال اتنين وسبعين ساعة أو أكتر لمن المصنع يشتغل بكامل طاقتو

الاستجابة دي ما واحدة عند كل البشر، الجينات بتلعب دور محوري في تحديد تفاعلنا مع الشمس، مستقبلات الميلانوكورتين (MC1R) - وهي جينات بتتحكم في نوع الصبغة - بتحدد نسبة إنتاج الميلانين الغامق مقارنة بالفاتح واستجابة الخلايا للأشعة، التنوع الجيني ده هو البفصل بين تفاعل الناس مع الشمس

في البشرات الفاتحة شديد الجين ده بفرز صبغة فاتحة وضعيفة ما بتقدر تحمي الجلد، فبتكون النتيجة حرق والتهاب شديد بدل اسمرار، لكن في بشرتنا الداكنة البنصنفها كأنماط ضوئية من الرابع للسادس (Phototypes IV-VI)، المصنع بكون نشط جدا ومجهز بكميات كبيرة من الإيوميلانين الغامق البتفاعل بسرعة وبقوة مع أي ضوء

عشان كده دراسة الباحث محمود وفريقو أثبتت انو الضوء المرئي براهو قادر يعمل تصبغ فوري وتصبغ مستمر في بشرتنا الداكنة من غير أي حاجة لأشعة فوق بنفسجية، والتصبغ ده بكون أغمق وبستمر لفترة أطول بكتير مقارنة بتأثير الأشعة فوق البنفسجية أ (UVA1)

التصبغ الفوري عندنا ما سحابة صيف بتفوت في ساعات زي ما بحصل في البشرات الفاتحة، هو تفاعل قوي بمهد لاسمرار ثابت بفضل نشاط خلايانا الصبغية وقدرتها العالية على تخزين وإعادة توزيع الصبغة، فهمنا لآلية المصنع والفرق بين التصبغ الفوري والمتأخر بوضّح لينا نقطة جوهرية في العناية

الواقي الشفاف العادي براهو ما بكفي عشان يمنع الكلف والبقع عندنا، لأنو بحمي من الأشعة فوق البنفسجية وبقلل الاسمرار المتأخر، لكن بخلي الضوء المرئي يمر ويأكسد الميلانين الجاهز ويعمل لينا تصبغ فوري، فنحنا بحاجه لحماية إضافية تصد الضوء المرئي المتمثلة في أكاسيد الحديد الموجودة في الواقي الملون، عشان نمنع مصنع اللون من الاستنفار من الأساس

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام