الأشهر والأهدأ

أشهر سرطان في الجلد، وأكتر سرطان بصيب البشر على مستوى العالم، هو سرطان الخلايا القاعدية (basal cell carcinoma)، السرطان ده ببدأ من الخلايا القاعدية الموجودة في أسفل طبقة البشرة، وهو بعتبر الممثل الأكبر للنوع البكسر الحيطان وما بسافر

ورغم انو اسمو سرطان، إلا انو نموه بطيء شديد، وممكن يقعد شهور أو حتى سنين يكبر بمليمترات بسيطة، والأهم من ده كلو، قدرتو على الانتشار لأعضاء بعيدة زي العقد اللمفاوية أو الرئة نادرة جداً، وبتكاد تكون معدومة في الحالات العادية

علشان كده، هو أهدأ واحد في العائلة الخبيثة، ونسبة الشفاء منو بالاستئصال المبكر ممتازة شديد، لكن الهدوء ده ما معناهو نتجاهلو، مشكلة سرطان الخلايا القاعدية الأساسية انو لو اتساب من غير علاج، بواصل الأكل والتدمير الموضعي في الأنسجة الحولو

ولأنو غالباً بطلع في مناطق معرضة للشمس زي الوش والأنف والأضان وحوالين العيون، التدمير ده ممكن يأثر على وظائف الأعضاء دي ويخلي عملية استئصالو وتجميل المكان معقدة وصعبة كلما اتأخرنا

في الكتب والمراجع الطبية المبنية على البشرة البيضاء، السرطان ده بظهر كعقدة صغيرة لونها وردي أو لؤلؤي، وفيها شعيرات دموية دقيقة، وممكن تتقرح في النص، لكن في بشرتنا الداكنة، شكلو بختلف تماماً؛ بجي شايل صبغة الميلانين وبلبس لون غامق بخلي الطبيب والمريض يتلخبطوا في تشخيصو بسهولة

وده البخلينا نقيف معاهو وقفة خاصة، لأنو شكلو عندنا موش الشكل المرسوم في الكتب، وده البخلي التشخيص يتأخر ويدي الورم البطيء ده مساحة ياكل فيها براحتو، وفي البوست الجاي حنشوف كيف السرطان ده بتنكر في بشرتنا في شكل بقعة سودا أو شامة بريئة