الأنواع الخمسة

في البوست الفات عرفنا انو الخلية الصبغية (Melanocyte) هي الساكن البتمرد ويتحول لأخطر سرطان جلدي، الا وهو الميلانوما، لكن التمرد ده ما بياخد شكل واحد، لأن الخلية دي بتختار طرق مختلفة علشان تغزو بيها الجسم، وبناءً على طريقتها دي، الأطباء بصنفوها لخمسة أشكال رئيسية

النوع الأول هو الميلانوما السطحية المنتشرة، ودي بتعمل زي بقعة الزيت البتتوسع ببطء على سطح الجلد قبال ما تقرر تغوص لتحت، النوع التاني هو الميلانوما العقدية، ودي شرسة جداً وما بتضيع وقتها في التوسع السطحي، وإنما بتكوّن حبة أو عقدة وبتغوص لتحت في اللحم من أول يوم

النوع التالت هو النمشة الخبيثة، ودي بتطلع غالباً في وشوش كبار السن المعرضين للشمس سنين طويلة، وبتبدأ كبقعة نمش عادية وبتكبر بالتدريج، النوع الرابع هو الميلانوما المخاطية، ودي بتطلع في الأغشية المبطنة جوا الفم، والأنف، والمناطق التناسلية، وبتكون متدسية شديد

أما النوع الخامس، فهو الميلانوما الطرفية (Acral lentiginous melanoma)، ودي البتطلع في باطن الكفوف، والأخمص، وتحت الأظافر

وفي صفة ممكن تركب في أي واحد من الأنواع دي وتخليهو مخادع أكتر، الاهي الميلانوما عديمة الصبغة (Amelanotic melanoma)، كأنو الخلية السرطانية قررت تتخلى عن سلاحها القديم (الميلانين) وتظهر بلون وردي أو بلون الجلد العادي علشان العين ما تلقطها كشامة خطيرة

الخريطة دي كلها بتورينا مدى ذكاء الورم ده، لكن بالنسبة لينا نحن، وفي بشرتنا الداكنة، النوع الرابع والخامس هم الأهم، وتحديداً النوع الطرفي البنلقاهو في الأخمص (باطن القدم) والأظافر، النوع ده براهو بمثل وش الميلانوما عندنا، وفي البوست الجاي حنختو تحت المجهر، ونشوف الأرقام البتثبت ليه هو سرطاننا الأول في العائلة دي