الأخمص

في رحلتنا مع الميلانوما، عرفنا انو سرطاننا الأول في العائلة دي هو الميلانوما الطرفية (Acral lentiginous melanoma)، اللي بتتجاهل الوش وبتمشي للأطراف، والليلة حنقيف مع أشهر مكان بتنبت فيهو: باطن القدم أو الأخمص

المشكلة الكبيرة في باطن القدم اننا ما بنعاين ليهو كتير، ولو ظهرت فيهو حبة قاسية أو بقعة غريبة، أول تفكير بجي في راسنا انو ده كالو (Callus) من المشي الكتير، أو ثؤلول (Wart) أو عين سمكة، أو حتى قرحة عادية من احتكاك الجزمة، وفي حالة مرضى السكري، أي جرح بتشخص طوالي كقدم سكرية

السرطان ده بلبس عباية أهل البيت بامتياز، بظهر كبقعة بنية أو سودا بتكبر بالتدريج، وممكن تفتح وتعمل قرحة بتنزف وما بتندمل كلو كلو، التأخير بحصل لمن الزول يقعد يعالج في البقعة دي لشهور بكريمات الكالو، أو بالكي، أو بمضادات حيوية على أساس انها جرح ملتهب، والخلية السرطانية في الوقت ده بتكون بتغوص لتحت وبتجهز للسفر

القاعدة هنا واضحة وصارمة: أي قرحة في الأخمص ما اندملت خلال المدة المتوقعة ليها، أو أي بقعة متصبغة بدأت تكبر وتغير شكلها، دي محتاجة طبيب يعاين ليها وياخد منها عينة (خزعة) علشان المعمل يحسم الحكاية، الاستمرار في علاجها ككالو أو جرح عادي بعد فشل العلاج الأول هو الخطر الحقيقي

الفحص الدوري لكرعينّا ما بياخد دقيقة، لكنو بمثل الحد الفاصل بين الاكتشاف المبكر والعواقب الوخيمة

وفي مكان تاني أقرب وأصغر، وبتم تجاهلو أكتر من باطن القدم، حنشوفو في البوست الجاي لمن نعاين لأظافرنا