تغير لون الظفر أو ظهور خطوط فيهو حاجة بنشوفها كلنا، الفطريات، أو الضربات القديمة بالباب، ممكن تعمل تصبغات وتغيرات في شكل الظفر بياخد شهور علشان يطلع، لكن الميلانوما الطرفية مرات بتختار سرير الظفر علشان تنبت فيهو، ودي بنسميها الميلانوما تحت الظفر (Subungual melanoma)
علشان نفرز بين الخطوط الطبيعية أو الحميدة وبين الميلانوما، الأطباء بستخدموا قاعدة حروف إنجليزية بسيطة اسمها (ABCDEF)، باختصار، العلامات البتخلينا نشك هي:
أولاً، لو ظهر شريط طولي لونو بني غامق أو رمادي أو أسود، وعرضو كان أكتر من تلاتة مليمتر، أو بغطي أكتر من تلتين (٢/٣) مساحة الظفر
ثانياً، لو الخطوط المكونة للشريط ده كانت ما منتظمة وفيها تفاوت في درجات اللون
ثالثاً، لو التصبغ ده زحف من الظفر وصبغ الجلدة المحيطة بيهو ) بنسميها علامة هتشنسون Hutchinson sign(
رابعاً، لو الظفر براهو بدأ يتشقق ويتكسر من غير سبب واضح أو ضربة معروفة
دي العلامات البتخلي الخط البني يستدعي فحص بمنظار الجلد (Dermatoscope) علشان الطبيب يقرأ نمط التصبغ ويقرر لو محتاج عينة ولا لأ، الورم ده بكبر من الجذر وبتمدد لقدام، بعكس الدم المحبوس من ضربة قديمة البمشي لقدام مع نمو الظفر وبسيب وراهو مساحة نظيفة
لكن الشريط البني في الأغلب الأعم ما بيعني حاجة تخوف، ودي محتاجة بوست طمأنة لوحدها حنكتبو المرة الجاية، علشان نفهم طبيعة أظافرنا الداكنة