البوست الفات عن الميلانوما تحت الظفر عمل قلق لكثير من الناس، وخلانا كلنا نعاين لأظافرنا ونفتش عن أي خط غامق، الخوف ده مبرر لأننا اتكلمنا عن ورم شرس، لكن الحكاية ناقصة لو ما ختينا الأمور في حجمها الطبيعي، لأن الأغلبية الساحقة من الخطوط البنية في أظافرنا ما عندها أي علاقة بالسرطان أبدا
في بشرتنا الداكنة، ظهور خطوط طولية بنية أو مايلة للسواد في الأظافر (Longitudinal melanonychia) حاجة شائعة جداً لدرجة انها بتكاد تكون القاعدة مع التقدم في العمرما استثناء مخيف، الخلايا الصبغية الموجودة في منبت الظفر مرات بتنشط وبتبدأ تفرز ميلانين، والصبغة دي بتطلع لقدام مع نمو الظفر وتعمل الشريط البني ده
النشاط ده بكون طبيعي وفسيولوجي جداً، وممكن يزيد بسبب الاحتكاك المستمر، أو الشغل اليدوي، أو حتى مع الحمل، طيب، كيف نطمئن ونفرز الخطوط الطبيعية دي من الميلانوما؟
العلامات البتطمنك هي الكثرة والانتظام، الخطوط الطبيعية دي غالباً بتظهر في أكتر من ظفر واحد في الايدين أو الرجلين، وبتكون خطوط رفيعة (أقل من تلاتة مليمتر)، لونها بني متجانس، وما بتتغير بسرعة، والأهم من ده كلو انو الصبغة ما بتزحف للجلدة الحوالين الظفر، والظفر نفسو بفضل قوي وما بتشقق، الاستقرار على مر السنين هو أكبر دليل على الطمأنينة
علشان كده، ما كل شريط غامق بفتح ملف سرطاني، الثبات والانتظام هم شهود البراءة الأساسيين
وفي البوست الجاي، حنشوف ميلانوما بتكسر كل قواعد اللون البنعرفها، وبتجي بيضا أو وردية من غير أي ميلانين، وبتتخفى في شكل ورم حميد وصغير