الميلانوما العقدية

في البوستات الفاتت اتكلمنا عن قواعد بنفرز بيها الشامات الحميدة من الميلانوما، زي قاعدة (ABCDE) البتعتمد على عدم التماثل، والحدود الملخبطة، والألوان المتعددة، القواعد دي ممتازة جداً لاصطياد الميلانوما السطحية البتتمدد زي بقعة الزيت، لكن في نوع من الميلانوما بكسر القواعد دي كلها، واسمو الميلانوما العقدية (Nodular melanoma)

النوع ده بمثل الوجه الأشرس للورم، الخلية السرطانية هنا ما بتضيع وقتها في التوسع الأفقي على سطح الجلد كلو كلو، وإنما من أول يوم بتبدأ تنقسم وتغوص عمودياً لتحت في اللحم، المشكلة انو العقدة دي مرات بتجي متماثلة جداً، وحدودها واضحة، ولونها واحد (أسود أو بني غامق أو أزرق)، يعني لو قسناها بالقواعد القديمة حتنجح وتتصنف كشامة حميدة

علشان نقدر نصطاد النوع المخادع ده، الدكاترة أضافوا قواعد جديدة بتعتمد على السلوك بدل الشكل، أي عقدة أو حبة تتوفر فيها علامات (EFG): يعني تكون مرتفعة عن سطح الجلد (Elevated)، وقاسية الملمس (Firm)، وبتكبر وتنمو باستمرار (Growing)، دي بتستدعي استئصال وفحص نسيجي طوالي

القاعدة الذهبية هنا انو التغير السريع والصلابة هم جرس الإنذار الحقيقي، الورم ده ما بيدينا زمن نراقبو شهور، وكل مليمتر بغوصو لتحت بقربو من الأوعية الدموية واللمفاوية، وبقلل فرص النجاة بصورة حادة

وفي البوست الجاي حنشوف ميلانوما بتسيب الجلد المكشوف كلو، وتتخفى في مناطق الزول ما بفكر يعاين ليها أصلاً