حساسية الحلمة اللي ما إكزيما

مرات بتجينا مريضة بتشتكي من إكزيما وقشور وحكة في حلمة الثدي، بتستخدم كريمات كورتيزون ومرطبات، والحالة بتخف شوية وترجع تهيج تاني، وبتاخد شهور وأحياناً سنين في الدوامة دي

إكزيما الثدي حاجة شائعة جداً ومطمئنة، خصوصاً عند الأمهات المرضعات، أو بسبب حساسية من نوع القماش أو الصابون، الإكزيما العادية دي غالباً بتصيب الثديين مع بعض، وبتحوم حوالين الهالة البنية، لكنها ما بتجي في الحلمة ذاتها وما بتضربها كتير، دي مشكلة سطحية ومقدور عليها تماماً

القرينة بتنقلب وتعلن عن الضيف المخادع لمن «الإكزيما» دي تكون في ثدي واحد بس، وتبدأ من الحلمة ذاتها وبعد داك تزحف وتتمدد للهالة الحواليها، والأهم من ده كلو، انها ما بتستجيب لكريمات الكورتيزون بشكل شافي، الحالة دي بنسميها داء باجيت الثديي (Paget disease of the breast)

المرض ده ما إكزيما، وإنما هو قناع لسرطان كامن متدسي جوا قنوات الثدي، الخلايا السرطانية بتزحف من جوا القنوات لحدي ما توصل لسطح الجلد في الحلمة، وتعمل المنظر القشري الأحمر ده، الإحصائيات بتوري انو التأخير في تشخيص الحالة دي متكرر شديد، ومرات بصل لسنتين بسبب الخلط بينها وبين الإكزيما المعتادة

تطبيق قانون الباب هنا بنقذ حياة: أي طفح قشري في حلمة واحدة ما استجاب للعلاج، ده ما بتعالج بمرهم أقوى، وإنما بستدعي أخذ عينة من الجلد وفحص دقيق للثدي

وليهو أخ شقيق بيسكن في مواضع أكتر إحراجاً، وبتأخر اكتشافو أكتر بكتير، وده الحنشوفو في البوست الجاي