باجيت خارج الثدي

في البوست الفات اتكلمنا عن داء باجيت البصيب حلمة الثدي وبتتخفى في شكل إكزيما، الليلة حنمشي لضيف تاني من نفس العيلة، بلبس نفس التوب، لكنو بختار مواضع أكتر إحراجاً وبتأخر تشخيصو بصورة أطول بكتير

مرات بظهر طفح جلدي لونو أحمر ومتقشر في الملاين (بين الفخذين)، أو حوالين المناطق التناسلية، أو الشرج، ومرات تحت الإبط، الزول طوالي بفتكر انو دي فطريات (Tinea) أو تسلخات عادية بسبب الحر والعرق، ودي فعلاً أسباب شائعة جداً ومطمئنة، وبتستجيب بسرعة لمضادات الفطريات والكريمات المهدئة

لكن القرينة بتنقلب وتطبق قانون الباب لمن الطفح ده يكون عبارة عن لوحة حمرا واضحة الحدود، عليها قشور بيضا كأنها رشة سكر، والأهم من ده كلو انو ما بستجيب لأي علاج فطري أو كورتيزون لشهور طويلة، المرض ده بنسميهو داء باجيت خارج الثدي (Extramammary Paget disease)

الدراسات بتوري انو متوسط التأخير في تشخيص المرض ده بصل لحوالي عشرين (٢٠) شهر، كلو بضيع في علاجات تجريبية، والمشكلة الأكبر انو المرض ده ما قاعد في الجلد براهو؛ في نسبة تتراوح بين عشرة لتلاتين بالمية (١٠-٣٠٪) من الحالات، بكون الطفح ده مجرد قناع لسرطان داخلي متدسي في الأمعاء، أو المسالك البولية، أو الأعضاء التناسلية، والنسبة دي ممكن تقفز لاتنين وأربعين بالمية (٤٢٪) لو الطفح كان حوالين الشرج

الرسالة هنا قاطعة: أي «فطريات» في المناطق الحساسة ما استجابت للعلاج الصحيح في المدة المحددة، دي ما بتتعالج بمرهم سحري جديد، وإنما بتستدعي خزعة من الجلد ومسح كامل للأعضاء الداخلية

وفي البوست الجاي حنشوف ورم تالت، اسمو ذاتو بلخبط الناس ويخليهم يفتكروه فطريات، وهو في الحقيقة سرطان بتخفى في شكل إكزيما أو صدفية