لو لاحظت انو لون جلدك بدأ يغمق بالتدريج، من غير ما تتعرض لشمس قوية ولا تستعمل كريمات، حتفتش وين علشان تعرف السبب؟
في العادة، السمار وتغير لون الجلد لدرجات أغمق حاجة شائعة شديد وما بتخوف، أشيع الأسباب بتكون التعرض الطويل للشمس، أو الاحتكاك المستمر، أو آثار بعد التهابات الجلد زي الأكزيما، أو حتى مجرد طبيعة جينية بتخلي بعض المناطق أغمق من غيرها، دي كلها أسباب موضعية ومطمئنة تماما
لكن مرات، السمار بكون رسالة من جوا الجسم، واحدة من الحالات المهمة البتكتب أثرها كلون غامق منتشر هي مرض أديسون (Addison's disease)، وده بحصل لمن الغدة الكظرية الفوق الكلى تتعب وما تقدر تفرز هرمون الكورتيزول بكمية كافية
في بشرتنا الداكنة، السمار العام ده بصعب شديد تلاحظو في بدايتو، لأنو بختلط مع لوننا الطبيعي، علشان كده، الفحص ما بكتفي بمعاينة الوش، وإنما بمشي لمناطق محددة السمار فيها بكون أوضح وشاذ عن العادة، المناطق دي بتشمل اللثة والغشاء المبطن للفم من جوا، البتظهر فيها بقع بنية غامقة أو مزرقة، وبرضو خطوط الكف وتجاعيد الايدين بتغمق بوضوح، وحتى الندبات القديمة والجروح السابقة ممكن يرجع لونها يغمق من جديد
الفرق العملي والمهم انو السمار المرتبط بأديسون ما بجي براهو، وإنما غالباً بكون مصحوب بتعب شديد وإرهاق ما طبيعي ونقصان وزن وهبوط مستمر في ضغط الدم ودوخة لمن الزول يقيف، يعني القرينة الجلدية هنا بتكمل قصة التعب العام، وبتكون شاهد صامت على نقص الكورتيزول
لو داير تشوف شكل السمار ده في اللثة وخطوط الكف على بشرة زي بشرتنا، فتش في قوقل صور بعبارة (Addison's disease hyperpigmentation dark skin)، علشان تعرف الأماكن البنفتش فيها، ما علشان تشخص أي سمار طبيعي عندك من صورة
وفي الحلقة الجاية حنشوف شاهد مختلف، دهون بتطلع فوق الجلد وتعمل عقد علشان تقول لينا كلام مهم عن الكوليسترول والدهون الثلاثية