ظهور حبوب أو عقد تحت الجلد حاجة شائعة شديد وبتحصل يوماتي
الأغلبية الساحقة منها بتكون حاجات حميدة وموضعية، زي الأكياس الدهنية العادية، أو الثآليل، أو تضخم الغدد العرقية، ودي كلها أسباب موضعية ما عندها أي علاقة بمستوى الدهون في الدم ولا بتستدعي قلق جهازي
لكن لمن تظهر عقد صفراء أو مايلة للبرتقالي، وبتكون بارزة فوق الجلد أو على الأوتار، هنا بنسميها الأورام الصفراء أو الزانثوما (Xanthoma)، دي ما أورام بالمعنى المخيف، وإنما ترسبات بتاعت دهون وكوليسترول جوا خلايا المناعة في الجلد،
الزانثوما عندها أشكال كتيرة، وكل شكل بورينا ياتو نوع من الدهون هو المرتفع، مثلاً، لمن تظهر حبوب صغيرة كتيرة فجأة في الظهر والأرداف وأطراف الايدين والرجلين (eruptive xanthoma)، دي قرينة قوية لارتفاع خطير في الدهون الثلاثية، والحالة دي بتكون إنذار مباشر لخطر محتمل زي التهاب البنكرياس
وفي نوع تاني بطلع كعقد صلبة فوق الأوتار، زي وتر العرقوب في الكعب أو مفاصل الأصابع، وده غالباً بكون شاهد على ارتفاع الكوليسترول الوراثي العائلي، وفي شكل نادر بظهر كخطوط صفراء جوا تجاعيد الكف نفسها
في بشرتنا الداكنة، اللون الأصفر أو البرتقالي ممكن يكون خافت وما واضح شديد، وتظهر الحبوب دي كأنها عقد أغمق من الجلد العادي أو لونها رمادي، علشان كده، التركيز على الملمس، والظهور المفاجئ، وأماكنها المحددة بكون أهم من مطابقة اللون بالحرف
لو داير تشوف الأشكال دي على بشرة زي بشرتنا، فتش في قوقل صور بعبارة (eruptive xanthoma dark skin)، علشان توسع عينك على الشكل، ما علشان تشخص أي ورم دهني براهو من صورة
وبكده بنكون قفلنا باب السكري والغدد والاستقلاب، وفي الحلقة الجاية حنفتح باب جديد ونمشي للكبد، ونشوف كيف الكبد المريض بوقع إمضاءو على الجلد بعناكب صغيرة وكف أحمر