مرات الكبد لمن يمرض لفترات طويلة وتتليف أنسجتو، بوقع إمضاءو على الجلد بعلامات وعائية مميزة، أشهر العلامات دي هي الأورام الوعائية العنكبوتية (spider naevi)
وهي عبارة عن نقطة حمرا في النص طالعة منها شعيرات دموية صغيرة زي كرعين العنكبوت، العناكب دي بتظهر غالباً في النص الفوق من الجسم، زي الوش والرقبة والصدر، وهنا بجي دور اختبار الضغط بالقزاز الاتعلمناهو في الباب (صفر) من السلسلة
لمن تضغط على العنكبوت ده بقزازة، اللون بختفي تماماً، ولمن ترفع يدك، الدم برجع يملأ النقطة في النص أولاً وبعد داك بنتشر للكرعين
العلامة التانية البتجي معاها هي احمرار الكفوف (palmar erythema)، وتحديداً في الأطراف والبروزات العضلية تحت الإبهام والخنصر، وفي البشرة الداكنة ممكن نحتاج نقارن كف الزول بكف زول سليم من أهلو علشان نلاحظ الفرق في اللون والحرارة
لكن زي ما اتعودنا في السلسلة دي، وجود العلامة ما بمثل حكم نهائي، الأورام العنكبوتية واحمرار الكفوف ممكن تظهر بصورة طبيعية تماماً عند الحوامل بسبب تغير الهرمونات، وممكن تظهر عند ناس أصحاء من غير أي مرض، فهي في الأغلب الأعم حميدة ومطمئنة لو جات براها في سياق مفهوم
القرينة دي بتكتسب أهمية لمن العناكب دي تظهر فجأة بأعداد كبيرة، وتترافق مع تعب عام وصفار في العين، أو انتفاخ في البطن، وقتها بتتحول لرسالة واضحة انو الكبد محتاج فحص عاجل، وما مجرد تغير عابر في الأوعية
لو داير تشوف شكلهم على بشرة زي بشرتنا، فتش في قوقل صور بعبارة (spider angioma dark skin) و(palmar erythema dark skin)، علشان توسع عينك على الشكل، ما علشان تفزع من أي نقطة حمرا
وفي المرة الجاية حنرجع للحكة البتطير النوم، بس المرة دي حكة بتبدأ في باطن الكفوف والأخمص من غير أي طفح