الباب الثاني: حكة الليل في الكفوف والأخمص

زول بصحى من النوم نص الليل بحك في باطن كفوفو وأخمص كرعينو بصورة متواصلة، ولمن يعاين لجلدو ما بلقى أي طفح ولا حبوب ولا احمرار، الجلد بكون شكلو سليم تماماً، لكن الإحساس بالحكة عنيف ومزعج

الحكة المزمنة دي عندها أسباب شائعة جداً، زي جفاف الجلد الشديد، أو الحساسية، دي كلها أمراض جلدية بحتة ومقدور عليها، لكن لمن الحكة تتركز في الكفوف والأخمص في بدايتها، وتزيد بالليل بوضوح، وتكون من غير طفح أولي، هنا وزن القرينة بتغير، والطبيب طوالي بفكر في الكبد ومسار العصارة الصفراوية

الحالة دي مرتبطة بركود العصارة الصفراوية (cholestasis)، لمن الكبد ما يقدر يصرف العصارة بصورة طبيعية، في مواد معينة بتتراكم في الدم وبتستفز الأعصاب الصغيرة في الجلد، فبتبدأ الحكة العنيفة دي البتخلي الزول يهرش لحدي ما يسلخ جلدو

العلامة دي ممكن تسبق ظهور الصفار الكلاسيكي بشهور، فالجلد هنا رفع إيدو وبدأ يشتكي قبال ما المشكلة الداخلية تكمل صورتها المعتادة، الرسالة المهمة هنا انو الحكة براها ما بتشخص مرض الكبد، لكنها شاهد قوي بستدعي تحاليل وظائف الكبد والمرارة، خصوصاً لو استمرت أسابيع وما استجابت للمرطبات ومضادات الحساسية العادية، لأنو علاجها الحقيقي ما بكون في كريمات الجلد، وإنما بكون في إصلاح مسار العصارة جوا الجسم

لو داير تشوف آثار الحكة دي على بشرة زي بشرتنا، فتش في قوقل صور بعبارة (cholestatic pruritus excoriations dark skin)، علشان تعرف شكل الخدوش الثانوية لمن المشكلة تطول

وفي المرة الجاية حنشوف علامات تانية بتكمل لوحة الكبد، أظافر بتفقد لونها، وتغيرات في شكل الصدر عند الرجال