الباب الثاني: أظافر بيضا وثدي عند الرجال

لمن الكبد يتليف أو كفاءتو تقل لفترة طويلة، توازن الهرمونات في الجسم بتلخبط، ومستويات البروتينات في الدم بتتغير، وده بترك أثرو في أماكن بعيدة من البطن، واحدة من العلامات دي بتظهر في الأظافر، وتحديداً حاجة بنسميها أظافر تيري (Terry's nails)، الظفر كلو بيبقى أبيض باهت كأنو زجاج مغبش، ما عدا شريط رفيع لونو وردي غامق أو بني في طرف الظفر الفوقاني، العلامة دي ما بتوجع، وما بتأثر على قوة الظفر، لكنها بتعكس تغير في الأوعية الدموية الدقيقة تحتو

العلامة التانية بتظهر عند الرجال، الاهي تضخم الثدي (Gynecomastia)، وبتحصل لأن الكبد المريض ما بقدر يكسر الهرمونات الأنثوية (الاستروجين) بصورة طبيعية، فبتتراكم وتعمل التغير ده

لكن زي ما اتعودنا في بروتوكول الشواهد، العلامات دي براها ما بتصدر حكم إعدام، تضخم الثدي عند الرجال حالة شائعة جداً في فترات البلوغ، وعند كبار السن، وممكن يكون بسبب أدوية كتيرة شائعة الاستخدام، وأظافر تيري برضو ممكن تظهر مع التقدم في العمر، أو مع أمراض تانية زي الفشل القلبي، يعني العلامات دي في الأغلب الأعم حميدة ومطمئنة

القرينة بتبقى قوية وتخلينا نفتش عن الكبد لمن العلامات دي تتجمع مع بعض؛ زول عندو صفار، أو عناكب دموية في صدرو، أو حكة، وظهرت معاهو أظافر تيري وتضخم في الثدي، هنا الكبد بكون المتهم الأول الما بنقدر نتجاهلو

لو داير تشوف شكل الأظافر دي على بشرة زي بشرتنا، فتش في قوقل صور بعبارة (Terry's nails dark skin)، علشان تدرب عينك على الفروقات، ما علشان تحكم على كبدك من صورة

وفي المرة الجاية حنفتح ملف فيروسات الكبد، ونشوف كيف التهاب الكبد الوبائي بيكتب رسالتو على الجلد بأمراض تانية قبال ما الكبد نفسو يشتكي