في البوست الفات جبنا سيرة الحزاز المسطح (Lichen planus) كواحد من الشواهد الممكن تدل على فيروسات الكبد، الليلة دايرين نقيف مع المرض ده براهو، لأنو من الأمراض الجلدية البتحب تتكلم بلغة بصرية مميزة جداً
الحزاز المسطح بظهر غالباً كحبوب مسطحة ومضلعة، لونها بنفسجي أو مايل للسواد في البشرة الداكنة، وبتلمع لمن تعاين ليها مع الضوء، أكتر الأماكن البحبها هي باطن المعصمين، الكواحل، وأسفل الظهر، وبتكون مصحوبة بحكة عنيفة شديد بتخلي الزول يفرك الجلد بدل ما يخدشو بالأظافر، وفي علامة تانية بتكمل الصورة، الاهي ظهور خطوط بيضا متشابكة زي الشبكة جوا الفم، وتحديداً في باطن الخدين
زي ما قلنا قبال كده، الحزاز المسطح في الأغلب الأعم بكون مرض مناعي براهو، وما عندو علاقة بأي مشكلة داخلية، وبتم علاجو موضعياً بكريمات أو أدوية عن طريق الفم وتختفي المشكلة، فما مفروض أي زول تظهر ليهو الحبوب دي يترعب ويفتكر كبدو اتدمر
لكن القرينة بتتقل وتستاهل فحص أعمق لمن الحزاز يكون منتشر ومقاوم للعلاج، أو يظهر فجأة وبصورة عنيفة، أو يكون مركز جوا الفم بصورة متقرحة ومؤلمة، في الحالات دي، الارتباط بفيروس التهاب الكبد سي (Hepatitis C) بكون وارد، والطبيب بطلب التحليل كإجراء احترازي علشان يقفل الباب ده
الجلد هنا بكون أدى واجبه كشاهد، والطبيب بقرأ الشهادة دي ضمن قصة المريض الكاملة، ما كحكم نهائي،
لو داير تشوف شكل الحبوب البنفسجية والشبكة البيضا على بشرة زي بشرتنا، فتش في قوقل صور بعبارة (Lichen planus dark skin)، علشان تتعرف على العلامة، ما علشان توصف لنفسك دواء من صورة
وفي المرة الجاية حنشوف شاهد غريب ومخيف، قرحة كبيرة بتاكل في الساق بسرعة، وبتكون مرتبطة بمرض في الأمعاء، والتعامل معاها بالجراحة بعمل كارثة حقيقية