الباب الثاني: القرح البترجع في الفم

قرحة صغيرة بتطلع جوا الفم تحديدا في باطن الخد أو اللثة، بتوجع كم يوم، بتخلي الأكل والكلام صعبين، وبعد مسافة بتمشي براها، دي حاجة أغلبنا جربها في مرحلة من حياتو، القرح دي شائعة شديد، وغالباً بتظهر مع التوتر، أو قلة النوم، أو لو الزول عضى لسانو وشفتو بالغلط، وبتندمل من غير أي مشكلة طبي

لكن القرينة بتتقل وتستاهل انتباه لمن القرح دي تكون كبيرة الحجم، وبترجع بصورة متكررة شديد وما بتدي الزول فرصة يرتاح، وتترافق مع أعراض تانية في الجسم، هنا الفم بكون بكتب رسالة عن مشكلة أعمق، والجلد (أو الغشاء المخاطي في الحالة دي) بشتغل كشاهد على تفاعل داخل

من الشهود المهمين ورا القرح المتكررة دي مرض بهجت (Behçet's disease)، وده مرض مناعي بجي معاهو قرح مشابهة في المناطق التناسلية، والتهاب واحمرار في العيون، ومشاكل في المفاصل

وبرضو القرح دي بتعتبر علامة لبعض أمراض التهاب الأمعاء زي داء كرون، وفي سبب تالت شائع ومهم جداً في بيئتنا، الاهو نقص الحديد في الدم، لأن الأغشية المخاطية جوا الفم بتحتاج الحديد علشان تتجدد بسرعة، ونقصو بضعفها وبخليها تتقرح بسهولة،

في الحالات دي، المرهم المخدر البنمسحو على القرحة براهو ما بحل المشكلة، وإنما الحل بكون في اصطياد السبب الداخلي وتصليحو، علشان كده، القرحة البترجع المرة ورا المرة، خصوصاً لو معاها ألم في البطن، أو تعب عام، أو قرح في أماكن تانية، دي محتاجة فحص طبي وتحاليل دم، موش مجرد مسكنات وكمادات

لو داير تشوف شكل القرح دي، فتش في قوقل صور بعبارة (recurrent aphthous stomatitis dark skin)، علشان تعرف شكلها، ما علشان تشخص نفسك من صورة، وفي المرة الجاية حنشوف طفح جلدي بحك بصورة هستيرية في الركب والمرافق، وارتباطو بمرض في الأمعاء، وكيف انو نادر شديد في بيئتنا