الباب الثالث: ظفر نصو أبيض ونصو بني

في الباب الفات اتكلمنا عن علامات الكلى البتخلي الزول يحك من غير طفح، والليلة حنعاين للأطراف، وتحديداً للأظافر، لأن الكلى لمن تتعب شديد بتسيب بصمتها هناك بوضوح

العلامة دي بنسميها أظافر ليندسي (Lindsay nails) أو أظافر النص والنص، لمن تعاين للظفر، بتلقى النص التحتاني (القريب من منبت الظفر) لونو أبيض باهت كأنو مغبش، والنص الفوقاني (الطرفي) لونو بني غامق أو وردي محمر، وفي خط فاصل واضح شديد بين اللونين

زي ما اتعودنا، تغير لون الأظافر عندو أسباب كتيرة جداً، الفطريات، الضربات القديمة، وحتى صبغات بعض الأدوية ممكن تغير لون الظفر، وفي بشرتنا الداكنة، وجود خطوط بنية أو أطراف غامقة شوية ممكن يكون طبيعي جدا، علشان كده تغير لون ظفر واحد بعد ضربة ما بستدعي فزع

لكن القرينة بتتقل وتكون شاهد صريح لمن التغير ده يظهر في أظافر كتيرة في الايدين، ويكون الانقسام بين الأبيض والبني واضح زي المسطرة، العلامة دي بترتبط ارتباط وثيق بالفشل الكلوي المزمن (Chronic kidney disease)، وبتظهر عند نسبة مقدرة من الناس البغسلوا كلى، التفسير العلمي ليها لسه ما محسوم تماماً، لكن بنعتقد انو النص الأبيض ناتج عن فقر الدم أو تورم الأنسجة، والنص الغامق ناتج عن زيادة صبغة الميلانين

لو داير تشوف شكل الأظافر دي على بشرة زي بشرتنا، فتش في قوقل صور بعبارة (Lindsay nails dark skin)، علشان تعرف كيف الظفر بتفصل لونين كيف، ما علشان تشخص أي تغير عادي في ظفرك من صورة

وفي المرة الجاية حنشوف حالة غريبة، الجلد فيها بحاول يطرد فضلات الجسم براهو في شكل حبوب قاسية، وبتجمع بين السكري والكلى في نفس الوقت