في عالم طب الجلدية والكلى، في علامة بتخلينا نعلن حالة الاستنفار القصوى، لأن التأخير فيها بكلف حياة، العلامة دي اسمها الكالسيفيلاكسيس (Calciphylaxis)
القصة بتبدأ عند نسبة قليلة من مرضى الفشل الكلوي (حوالي واحد لأربعة بالمية ١-٤٪)، لمن الكالسيوم والفوسفور يتلخبطوا في الدم بصورة حادة، ويقوم الكالسيوم يترسب جوا الأوعية الدموية الصغيرة في الجلد ويسدها تماماً، الدم بنقطع عن الجلد، والنتيجة بتكون ألم عنيف جداً ومبرح في منطقة معينة في الساق أو الفخذ أو البطن، قبال ما يظهر أي جرح مفتوح، بعدها الجلد ببدأ يقلب للون البنفسجي أو الأسود، وبتفتح قرحة ميتة ما راضية تندمل
هنا لازم ننتبه لعدم الذعر لأن القرح في الساقين شائعة شديد، وأغلبها بكون بسبب الدوالي، أو السكري، أو ضعف الشرايين، لكن لمن القرحة تسبقها آلام ما بتحتمل، وتظهر عند زول بغسل كلى، فهنا ممكن ما تكون قرحة عادية، وإنما حالة طوارئ بتستدعي تدخل طبي سريع
المرض ده خطير لأن الوفيات فيهو عالية، وكانت تاريخياً بتصل من خمسة وأربعين لتمانين بالمية (٤٥-٨٠٪)، ورغم انو في دراسات حديثة بتشير لإنو النسبة نزلت لحوالي تسعة وعشرين بالمية (٢٩٪) في بعض المراكز المتقدمة، إلا انو الخطر لسه كبير والسبب الأساسي للوفاة بكون التسمم الدموي من القرحة دي
في بشرتنا الداكنة، اللون البنفسجي الشبكي صعب يتشاف في البداية، علشان كده الاعتماد الكلي بكون على «الألم الشديد» والصلابة تحت الجلد
لو داير تشوف شكل القرحة دي، فتش في قوقل صور بعبارة (Calciphylaxis dark skin)، علشان تفهم مدى خطورتها، ما علشان تفزع من أي جرح عادي
وفي المرة الجاية حننتقل لعلامة بتظهر بعد بعض صور الأشعة الملونة، وبتخلي الجلد يتخشب