مرات المريض بحتاج يعمل صورة أشعة مقطعية أو رنين مغناطيسي علشان الطبيب يشوف تفاصيل دقيقة جوا الجسم، في الرنين المغناطيسي بالذات، الطبيب ممكن يطلب حقن مادة ملونة (صبغة) في الوريد بتحتوي على معدن اسمو الغادولينيوم (Gadolinium)
للناس العاديين العندهم كلى سليمة، المادة دي آمنة جداً وبتطلع من الجسم مع البول من غير أي مشاكل كلو كلو، لكن لمن المادة دي تتحقن لزول كليتو تعبانة شديد وما قادرة تصفي الدم، أو زول بغسل كلى، فالمادة دي بتقعد فترة طويلة جوا الجسم
ده بتستفز الخلايا البتبني الأنسجة، والنتيجة بتظهر على الجلد بعد أسابيع أو حتى شهور في شكل مرض اسمو التليف الجهازي الكلوي المنشأ (Nephrogenic systemic fibrosis)، الجلد في الساقين والايدين ببدأ يورم، وبعد داك بيبقى قاسي ومشدود لدرجة انو الزول بحس انو جلدو بقى زي الخشب، وحركة المفاصل ذاتها بتبقى صعبة ومؤلمة
المرض ده بورينا كيف الكلى العاجزة بتخلي الجلد يدفع الثمن، علشان كده، الخط الأحمر هنا واضح ومحسوم في كل الإرشادات الطبية: أي زول عندو قصور كلوي متقدم أو بغسل كلى، لازم ينبه دكتور الأشعة بحالتو قبال أي تصوير ملون، لأن الوقاية هنا هي الحل الوحيد، وعلاج التخشب ده بعد ما يحصل بكون صعب وعنيد شديد
لو داير تشوف شكل الشد والقساوة دي على بشرة زي بشرتنا، فتش في قوقل صور بعبارة (Nephrogenic systemic fibrosis dark skin)، علشان تعرف كيف الجلد بتغير ملمسو، ما علشان تفزع من أي أشعة عادية
وفي المرة الجاية حنشوف نقط حمرا بتظهر في منطقة معينة في الجسم، وبتكون جرس إنذار مبكر لمرض وراثي بضرب الكلى والقلب