ظهور نقط حمرا صغيرة على الجلد حاجة بنقابلها كل يوم، الأغلبية الساحقة من النقط دي بتكون عبارة عن أورام وعائية حميدة زي (Cherry angiomas) البتظهر مع التقدم في العمر، أو مجرد آثار لقرصات حشرات وحساسية عابرة، دي حاجات مطمئنة وما وراها أي مشكلة داخلية
لكن الشاهد الجلدي بغير لغتو لمن النقط الحمرا أو المايلة للبنفسجي دي تظهر متجمعة بكثافة في منطقة محددة جداً بنسميها منطقة لبس السباحة (Bathing trunk area)، الاهي أسفل البطن، والفخذين من فوق، والمناطق التناسلية
لمن النقط دي (في الطب اسمها الأنجيوكيراتوما Angiokeratomas) تتركز في المكان ده بالذات، وتظهر عند زول في مقتبل العمر، ويكون معاها ألم حارق في أطراف الايدين والرجلين، أو نقص في العرق، الجلد هنا بكون فتح ملف مرض وراثي نادر اسمو مرض فابري (Fabry disease)
المرض ده مشكلتو انو الجسم بفتقد لإنزيم معين، فبتتراكم مواد دهنية معقدة جوا خلايا الجسم، وتحديداً جوا الكلى والقلب، وبتبدأ تدمرهم بالتدريج، النقط الحمرا دي بتكون من أول العلامات البتظهر بره قبال ما الكلى تعلن فشلها جوا، التشخيص المبكر هنا بوزنو دهب، لأنو بفتح باب للعلاج التعويضي بالإنزيم الناقص قبال ما الضرر الداخلي يبقى دائم
لو داير تشوف شكل النقط دي وتوزيعها، فتش في قوقل صور بعبارة (Fabry disease angiokeratoma dark skin)، علشان تفهم التوزيع بتاعها، ما علشان تشخص أي حبة حمرا في بطنك
وفي المرة الجاية حنشوف بقع بيضا خفيفة، مرات العين بتعديها، لكنها بتشهد على وجود أورام جوا الكلى