كلنا بنعرف انو الأظافر الطبيعية بتكون محدبة شوية لبره، لكن مرات، الظفر ببدأ يغوص لجوا، وأطرافو تترفع لفوق، لدرجة انو بياخد شكل الملعقة حرفياً، وتقدر تخت فيهو قطرة موية من غير ما تدفق، العلامة دي في الطب بنسميها تقعر الأظافر أو الظفر الملعقة (Koilonychia)
في الأطفال الصغار، الأظافر ممكن تكون مقعرة شوية وطرية، ودي حاجة فسيولوجية ومطمئنة وبتتعدل براها مع النمو، وبرضو الناس الشغالين في مهن بتعرض ايدينهم لمواد كيميائية قاسية أو شغل يدوي عنيف ممكن أظافرهم تتأثر وتاخد الشكل ده، دي أسباب موضعية ومقدور عليها
لكن القرينة بتنقلب وتبقى شاهد صريح لمن الظفر الملعقة ده يظهر عند زول بالغ من غير سبب مهني واضح، العلامة دي بترتبط ارتباط وثيق جداً بنقص الحديد الشديد في الجسم (Iron deficiency anemia)، لو بتتذكروا في سلسلة الحديد، اتكلمنا عن «المصنع» الاهو نخاع العظم، وكيف انو «البواب» اللي هو هرمون الهيبسيدين بتحكم في دخول المواد الخام، لمن الحديد ينقص وتطول الأزمة، الأنسجة سريعة الانقسام زي الأظافر بتفقد قدرتها على البناء السليم، فبتطلع هشة ومقعرة
الجلد هنا وملحقاتو بكونوا كشفوا لينا عن أزمة تموين حقيقية جوا الجسم، الطبيب ما بوصف مقويات أظافر، وإنما بطلب فحص مخزون الحديد علشان يعالج أصل المشكلة
لو داير تشوف شكل التقعر ده، فتش في قوقل صور بعبارة (Koilonychia dark skin)، علشان تفهم شكل الملعقة المقصود، ما علشان تفزع من أي كسر في ظفرك
وفي المرة الجاية حنشوف كيف اللسان بيفقد خشونتو ويبقى أملس، ومعاهو سمار غريب في مفاصل الايدين بخصنا نحنا بالذات