اللسان الطبيعي بكون خشن وفيهو نتوءات صغيرة بتساعد في التذوق، لكن مرات الزول بلاحظ انو لسانو بقى أملس كلو كلو، ولونو أحمر زاهي، وبحرقو مع أي أكل فيهو بهارات أو حامض، الحالة دي بنسميها التهاب اللسان (Glossitis)
التهابات الفم عندها أسباب كتيرة وحميدة، زي الفطريات، أو حروق الأكل الساخن، أو حتى التهابات موضعية بسيطة، لكن لمن اللسان الأملس ده يترافق مع تغير عجيب في لون الجلد، وتحديداً سمار غامق وواضح جداً في مفاصل أصابع الايدين (Knuckles) وحوالين الفم، هنا الجلد بكون وفر علينا مشوار طويل وأشر لمشكلة محددة: نقص فيتامين ب١٢ (Vitamin B12 deficiency)
في بشرتنا الداكنة بالذات، تصبغ المفاصل ده بعتبر من أقوى وأبرز العلامات البتسبق حتى أعراض فقر الدم أو التنميل في الأطراف المرتبطة بنقص الفيتامين ده، فيتامين ب١٢ مهم شديد لانقسام الخلايا وللأعصاب، ونقصو بخلي الخلايا الصبغية تتجنن وتفرز ميلانين بزيادة في مناطق الاحتكاك
تصبغ المفاصل براهو ممكن يكون وراثة عادية وشائعة جداً في بيئتنا، لكن التجميعة بتاعت لسان أملس وتعب عام وتصبغ مفاجئ زاد في فترة بسيطة، دي ما وراثة، وإنما رسالة مسجلة بتستدعي فحص الدم طوالي
لو داير تشوف شكل السمار المرتبط بنقص الفيتامين ده على بشرة زي بشرتنا، فتش في قوقل صور بعبارة (Vitamin B12 deficiency hyperpigmentation dark skin)، علشان توسع عينك، ما علشان تشخص لون مفاصلك الطبيعي من صورة
وفي المرة الجاية حننتقل لمرض وراثي مشهور شديد عندنا، بفتح قرحة قاسية في الساق بتعذب أصحابها لشهور